ብመሰረት ኣሾሸይትድ ፕረስ ዘስፈሮ ዜና፡ ድሕሪ ምቁራጽ ተጻብኦታት ኣብ ሞንጎ መንግስቲ ኢትዮጵያን ዕጡቓት ሓይልታት ትግራይን፡ እቲ ዝዓበየ ተባሂሉ ዝግለጽ፡ 215 ናይ መግቢ ሓገዝ ዝጸዓና ቃፍላይ መካይን፡ ብዓርቢ 27 ግንቦት ካብ ከተማ ሳማራ ተበጊሰን ከምዘለዋን፡ ብቀዳም 28 ግንቦት ድማ መቐለ ክበጽሓ ትጽቢት ከምዝግበርን ተሓቢሩ።
እዚ ከምዚ ኢሉ እንከሎ፡ ሰራሕተኛታት ሰብኣዊ ትካላት፡ ተወሳኺ ሓገዝ ከምዘድሊ ክሕብሩ ከለው፡ ውድብ መግቢ ዓለም ድማ፡ ን 5.2 ሚልዮን ህዝቢ ትግራይ ንምዕንጋል ኣብ ሰሙን 500 መግቢ ዝጸዓና መካይን ከምዘድልያ ገሊጹ ይርከብ።
ኣብ ወርሒ መጋቢት ናይዚ ሒዝናዮ ዘለና ዓመት፡ መንግስቲ ኢትዮጵያ ናብ ትግራይ ሰብኣዊ ሓገዝ ንምእታው ክከኣል በይናዊ ውሳነ ምቁራጽ ተጻበኦታት ከምዘካየደ ዝዝከር ኮይኑ፡ ኣብ ትግራይ ዝርከብ መርሒነት ብወገኑ ነቲ ምቁራጽ ተጻብኦ ብምቅባል፡ ናይ ምቁራጽ ተጻብኦ ከምዝኣወጁ ይዝከር። ብተወሳኺ መራሕቲ ህወሓት፡ ትግራይ ኣብ ከበባ ምህላዋን፡ ዝኾነ መግቢ ይኹን ካልእ ቀረባት ኣብቲ ክልል የለን ከምዘየለ ክገልጹ ምጽንሖም ይፍለጥ።
ኣብ ሕዳር 2020 ዝተወለዐ ኲናት ሓድሕድ ኢትዮጵያ፡ ኣብ ሰሜናዊ ክፋል ኢትዮጵያ፡ ስቪላዊ ህዝቢ ንጥሜትን ዓጸቦን፡ ሕጽረት መግብን ተቃሊዑ ከምዘሎ ዝፍለጥ ኮይኑ፡ ውዱብ ሕቡራት ሃገራትን፡ ኣሜርካ እትርከብን ሃገራት፡ ናብ ክልል ትግራይ ዘይተገደበ ሰብኣዊ ረዲኤት ክኣቱ ክጽውዓ ምጽንሐን ይዝከር።