መንግስቲ ኣሜሪካ ብሰንኪ ለበዳ ኮሮና ዝሰዓበ ቁጠባዊ ቅልውላምን ንሱ ዘኸተሎ ተጽዕኖ ኣብ ልዕሊ ዜጋታትን ንምፉዃስ 600 ዶላር ኣሜሪካ ክዕድል ምኻኑ ኣፍሊጡ። እዚ መቐጸልታ ናይቲ ኣብ ወርሒ ሰለስተ ዝተዓደለ ሓገዝ ኮይኑ፤ እዚ ሒጂ ክዕደል ተወጢኖ ዘሎ ካብቲ ዝሓለፈ ዝተዋህበ ሓገዝ፡ ብፍርቂ ዝጎድል ምኻኑ ዝፍለጥ ኮይኑ፡ በዚ መሰረት ዓመታዊ ኣታዊኦም ክሳብ 75,000 ዶላር ዘእትዉ ዜጋታት 600 ክወሃቦም ከሎ ክሳብ 150,000 ዶላር፡ ዓመታዊ ኣታዊ ንዘለዎም መጻመዲ ድማ 1200 ዶላር ክወሃቦም እዩ። ኣብ ሕጊ ቀረጽ ኣሜሪካ ከም ርእሰ-ገዛ (Head of house hold) ተመዝጊቦም ዘለዉ፡ ክሳብ 112,500 ዶላር ኣሜርካ ዓመታዊ ኣታዊ ዘለዎም፡ 600 ዶላር ክወሃቦም ከም ዝኾነ ተፈሊጡ ኣሎ። ስድራቤታት እቲ ኣብ ዝሓለፈ ግዜ ካብ ዝተዋህቦኦም ክብ ብዝበለ 600 ዶላር፡ ንነፍሲ ወከፍ ትሕቲ 18 ዝዕድሚኡ ኣባል ስድራ ቤቶም ክወሃብ ምኻኑ ተሓቢሩ ይርከብ። ኣብ ዝሓለፈ ግዜ ንቁጠባዊ ሓገዝ ተባሂሉ ዝተዓደለ ገንዘብ፡ ብሰንኪ ኣብ ውሽጢ ባይቶ ዝተፈጠረ ዘይምስምማዕ ተቋሪጹ ከምዝጸንሐ ይፍለጥ። ብተወሳኺ መንግስቲ ካናዳ፡ ካብ ስራሕ ጠጠው ኢሎም ንዘለዉ ዜጋታቱ፡ ነዚ ዝሓለፈ ሾመንተ ኣዋርሕ ንመሕወዪ ቁጠባዊ ዕንወትን፡ ቀረብን ውሕስነት ዝውዕል ወርሓዊ ይኸፍሎም ከምዘሎ ይፍለጥ።
ሰቲት ሚድያ ብግዱሳት ኤርትራዊያን ዝተመስረተት ናጻ ዘይመኽሰባዊት ትካል መራኸቢ ብዙሓን’ዩ። ሰቲት ካብ ማሃሪ ሓበሬታ ምስናቕ፡ ክብርታትን ባህላታትን ምዕቃብን፡ ብዙሕነት ናይ ኣተሓሳስባን ምጽውዋርን ንምዕባይ ኣብ ዝብል መትከላት ዝተመስረተት ናይ ሚድያ ትካል ኢያ። ሰቲት ብተፍርዮም ትሕዝቶ ሚድያ ኣብ ኤርትራ ፍትሒ፡ ናጽነት፡ መሰል ዜጋን ዲሞክራስን ክረጋገጽ ትጉስጉስ። ቐንዲ ዕላማን ዕማምን ሰቲት ንህዝቢ ኤርትራ ብሓፈሻ ፡ ኣብ ውሽጢ ንዘሎ ድማ ብፍላይ፥ እዋናዊ፥ ኣብ ፖሎቲካዊ፡ ቁጠባዊ፡ ማሕበራዊን ባህላዊን ዘተኮረ ሃገራውን ዞባውን ምዕባሌታት ምድህሳስን፡ ታሪኽ ህዝቢን ሃገርን ኤርትራ ምንጽብራቅን ኢዩ። ብመንጽር ‘ዚ ናይ ስራሕ ዕላማን ተበግሶን፡ ሰቲት መራኽቢ ብዙሓን ኣብ ሕብረተሰብናን ሃገርናን ኤርትራ፡ ርትዓዊን እወታውን ማሕበረ-ፖለቲካዊ ሎውጢ ክጎናጸፍ ትቓለስ።