ስዊዘርላንድ ኤርትራውያን ከይስጎጉን ወረቐት ክወሃቦምን ዝጽውዕ ጥርዓን ናብ መንግስቲ’ታ ሃገር ተረኪቡ።

ኣብ 2018 ኤርትራን ኢትዮጵያን ውዕል ሰላም ድሕሪ ምኽታመን ፈደረላዊ መንግስቲ ስዊዘርላንድ ዝወሰዶ ቀዳማይ ስጉምቲ እንተ ኔሩ፡ ምስ ሰበ-ስልጣን ኤርትራ ብምዝርራብ ኣብ ስዊዘርላንድ ንዝርከቡ ገለ ኤርትራው ስደተኛታት ናብ ሃገሮም ምምላስ እዩ ኔሩ::

መንግስቲ ስዊዘርላንድ ነዚ ንምትግባር፡ ድሕሪ ውዕል ሰላም ተቐዳዲሙ ናብ ኤርትራ ልኡኻት ብምስዳድ ምስ ሰበ-ስልጣን እታ ሃገር ክዘራረብ እንከሎ፡ ኣብ ህሉው ኩነታት ኤርትራ ድማ መጽናዕቲ ኣካይዱ:: ድሕር’ቲ ርክብ ስዊዘርላንድ ምስ ኤርትራ ዲፕሎማስያዊ ርክብ ክተመሓይሽ ክትሰማማዕ እንከላ ድሒራ ድማ፡ ኣብ ኤርትራ ሞያዊ ስልጠና ክትህብ ናይ 6 ሚልዮን ፍራንክ ፕሮጀክት ሓንጺጻ::

ስዊዘርላንድ ብተወሳኺ “ኣብ ኤርትራ ሰላም ኣሎ፥ ኩነታት ተቐይሩ እዩ፡” ብዝብል ምኽኒት ኣብ ስዊዘርላንድ ዝቕመጡ መምበሪ ወረቐት ዘይረኸቡ ኤርትራውያን ናብ ኤርትራ ንኽትመልስ ወሲና:: በዚ ድማ 9 ሽሕን 200 ክምለሱ ኣለዎም ዝበለቶም ከተለሊ እንከላ፡ 200 ብህጹጽ ክምለሱ ዝተረፉ ድማ ቀስ ብቐስ ክምለሱ ከምዝኾኑ ኣፍሊጣ::

ኣብዚ 200 ኤርትራውያን ጠቕሊልኩም ውጹ ዝብል ደብዳቤ ተቐቢሎም ኔሮም። እንተኾነ ዝተፈላለያ ስዊዛውያን ጉጅለታት ተጣበቕቲ ሰብኣዊ መሰላትን ሓተቲ ዕቊባን ብዝገበረኦ ጻዕሪ፡ እቲ ናይ ምስጓግ መስርሕ ደው ኢሉ:: ስዊዘርላንድ ምስ ኤርትራ ጀሚራቶ ዘላ ርክብን ናይ ምስጓግ መስርሕን ደው ከተብል ድማ ብሓያሎ ጉጅለታት ተጣበቕቲ ሰብኣዊ መሰላት ጸቕጢ ይግበረላ ኣሎ::

ተጣበቕቲ ሰብኣዊ መሰላት ሓተቲ ዕቁባን ኣብ ልዕሊ ፈደረላዊ መንግስቲ ስዊዘርላንድ ጸቕጢ ንምግባር 11’221 ናይ ጥርዓን(ፐትሽን) ፌርማ ብምእካብ ብ13 ነሓሰ ኣብ ከተማ በርን ኣብ ዝርከብ ቤት ጽሕፈት ፈደራል ኣረኪቦም:: እተን ‘ሪጂ ኣዚል’ Riggi-asyl: ‘ጊቭ ኤ ሃንድ ‘Give a hand’ ሶሊዳሪታትስነት Solidaritätsnetz: ሳሊዳሪተ ሳን ፍሮምቴኽ Solidarité sans Frontièresን ካልኦትን ልዕሊ 20 ተጣበቕቲ ሰብኣዊ መሰላት ሓተቲ ዕቊባን ኣብቲ ዘቕረበኦ ጥርዓን፡ ኣብ ስዊዘርላንድ ዘለዉ ኤርትራውያን ወረቐት ክወሃቦም: ናይ ኤርትራ ናይ ሰብኣዊ መሰላት ኩነታት ከይተቕየረ ዝኾነ ኤርትራዊ ከይስጎግ: ስዊዘርላንድ ምስ ሰብኣዊ መሰላት ዘይሕሉ መንግስቲ ኤርትራ ዝጀመረቶ ዝርርብ ደው ከተብሎን ካልእን ዝጽውዕ እዩ::

እተን ተጣበቕቲ ሰብኣዊ መሰላት ብተወሳኺ ኣብ መንጎ ኤርትራን ኢትዮጵያን ውዕል ሰላም ይከተም ደኣ እንበር ውሽጣዊ ኩነታት ኤርትራ ከምዘይተቕየረ ገሊጸን::

ኣብቲ ኣጋጣሚ ኣባለት ሰልፊ ቀጠልያን ኤትራውያንን ተቓለስትን ተረኺቦም ኔሮም::