ብ “ቱከህ” ዝብል ሳጓ ዝፍለጥ፡ ወዲ 71 ዓመት ዩሱፍ ዓብዲ ዓሊ ዝተባህለ፡ ወተሃደራዊ ሓልፊ ነበር ሶማል ብ20 ታሕሳስ ካብ ሕብራት መንግስታት ኣመሪካ፡ ናብ ሶማልያ ከምዝተሰጎገ ክፍሊ ኢሚግረይሽን ናይ’ታ ሃገር ኣፍሊጡ። እቲ ሶማሊያዊ ሓልፊ ነበር፡ ሌተናል ኮሎኔል ነበር ኮይኑ ኣብ ሃገራዊ ሰራዊት ሶማልን ኣዛዚ ሓምሻይ ብርጌድን ምንባሩን እቲ ብክፍሊ ኢሚግረይሽን ዝወጸ ሓበሬታ የብርህ። ዩሱፍ ዓብዲ ዓሊ፡ ኣብ 1980ታት ኣብ ሶማልያ ኣብ ዝተኻየደ ኣረሜናዊ ሲቪላዊ ግጭት ኣብ ተግባራት ጭቖናን ምግሃስ ሰብኣዊ መሰላትን ተሳታፉ ተባሂሉ ከምዝተኸሰን በዚ መሰረት ድማ ገበነኛ ኮይኑ ስለ ዝተረኽበን፡ መንግስቲ ኣመሪካ ናይ ምጥራዝ ውሳነ ከምዝበየነሉን እዩ እቲ ዝወጸ ሓብሬታ ዘብርህ።
እዚ ናብ ሕ.መ.ኣ ካብ ዝምጽእ ኣትሒዙ፡ ኣብ ግዝኣት ቨርጂንያ ይነብር ምንባሩ ዝተፈልጠ ወተሃደራዊ ሓላፊ ሶማል ነበር፡ ካብ ግንቦት 1987 ክሳብ ሓምለ 1988 ኣዛዚ ሓሙሻይ ብርጌድ ኮይኑ ኣብ ሰሜናዊ ምዕራብ ሶማልያ ሰፊሕ ግህሰት ሰብኣዊ መሰላት ዘጠቓለለ ወተሃደራዊ ስርሒታት ከምዘካየደ፡ ኣብቲ ዝተመስረተሉ ክሲ ተጠቒሱ ኣሎ። ገለ ካብቲ ብ ኮሎኔል ዩሱፍ ዓብዲ ዝተፈጸሙ ገበናት፡ ምርሻን ተቃወምቲ፡ ምንዳድ ዓዲታት ዝኣመሰሉ እዮም።
