ኤርትራዊት “ንግስቲ ኣስቴር”

ግዚኡ ኣብቲ ብ “ቀይሕ ኮኾብ” ዝፍለጥ 6ይ ወራር ‘ዩ ነይሩ። ጸላኢ ንሰውራ ኤርትራ ሓንሳብን ንመጨረሽታን ካብ ገጽ ምድሪ ንምድምሳስ ይሸባሸበሉ ኣብ ዝነበረ፡ ኣብ ለካቲት 1982 እዩ ‘ቲ እዋን። ጸላኢ እቲ ወፍሪ ዕውት ንምግባር ዳርጋ ንክልተ ዓመት መመላእታ ምድላው ጌሩ ኣብ ምጽፋፍ ይሸባሸብ ነበረ።
ኣብዚ እዋን እዚ ጸላኢ ቀመማዊ ጋዝ ካብ ሃገረ ሩስያ ሸሚቱ፡ ኣብቲ ወፍሪ ክጥቀመሉ ምዃኑ ይንገር ስለ ዝነበረ፡ ብሸነኽ ተጋደልቲ ኤርትራ ዓቢ ስጋኣትን ሻቅሎትን የሕዲሩ ነይሩ። እንታይ ዓይነት ቀመማዊ ጋዝ ከም ዝጥቀምን ብኸመይ ክከላኸልዎ ከም ዝኽእሉን ንፍምላጥ ድማ ተጓየዩ።
ዶር. ኣሰፋው ዝርከብዎ ልኡኻት ድማ ናብ ሃገር እንግሊዝ ተላእኹ። ሓለፍትን ክኢላታትን ብምርካብ ድማ ሃገረ ሩስያ እተፍርዮ ቀመማዊ ጋዝን ሃገረ ብሪጣንያ ንምክልኻሉ ሓገዝ ክትገብርሎም ንምሕታት እቲ ዕላማ። ክሰልጦም ግና ኣይከኣለን። ብፈሓም ከኣ መከላኸሊ ማስክ ከዳልዉ ወሰኑ።
ብወገን መሪሕነት ህግሓኤ ከምዚ ምድላዋት እናተገብረ ከሎ፡ ሓንቲ ኤርትራዊት ኣደ ኣብ ውሽጢ መንግስቲ ዓዲ እንግሊዝ፡ ከም ጸሓፊት ማርጋሬታ ታቸር ኮይና ትሰርሕ ነይራ። እዚ ወረ እዚ ምስ ሰምዐት ኣዝያ ሓዘነትን ተሻቀለትን። ድቃስ ዝበሃል ከኣ ካብኣ ሃደመ። ብምንታይ ክትሕግዝ ከም ትኽእል ከኣ ሓሰበት።
ሓደ እዋን ብጉሁይ ልቢ ብድፍረት ናብ ቀዳማይ ምኒስተር ዝነበረ ማርጋሬታ ታቸር ብምእታው፡ ልመናኣ ክትነግር ሓለነት። እናበኸት ድማ ንማርገሬታ ታቸር፡ መንግስቲ ኢትዮጵያ ካብ ሃገር ሩስያ ቀመማዊ ጋዝ ከም ዝገዝአን፡ እዚ ከኣ ንጽንተት ኣሕዋታ ክጥቀምሉ ምዃኑን እናነብዐት ነገረታ። ጥፍኣት ህዝባ ክትርኢ ከም ዘይትደልን፡ ቀዳማይ ሚኒስተር ከኣ ክትገብሮ ትኽእል ነገር እንተለዋ ብትሕትና ሓተተታ።
ማርገሬታ ታቸር ብስምባደ ተቀላጢፋ፡ ኣብቲ ጊዜ ፕረሲደንት ሃገረ ሩስያ ዝነበረ ጎርባቸ ብምድዋል ቀመማዊ ጋዝ ንሃገር ኢትዮጵያ ሸይጦም እንተኾይኖም ሓተተቶ። ጎርባቸ ብወገኑ ርግጸኛ ስለ ዘይነበረ፡ ንዝምልከቶም ሓታቲቱ ክምለሳ ምኻኑ ነገራ። ድሕሪ ምሕታት ከኣ እቲ ወረ ሓቂ ከም ዘይኮነ ነገራ። ማርገሬታ ታቸር ከኣ እቲ መልእኽቲ ነታ ኤርትራዊት “ንግስቲ ኣስቴር” ኣረጋገጸትላ።
መራሕቲ ገድሊ ኤርትራ እዚ ምስ ፈለጡ ከኣ ዓቢ እፎይታ ተሰምዖም። ዋላ’ኳ ንቀመማዊ መከላኸሊ ዝኸውን ማስክ ምድላው እንተዘይኣቋረጹ፡ ካብ ጭንቀት እፎይ እሎም፡ ዝበዝሕ ሓይሎም ኣብ ካልእ ምድላዋት ብምግባር፡ ነቲ ዝዓበይ ወራር ኣብ ምጽብባይ ተጸምዱ።
እዛ ኤርትራዊት ሓፍቲ/ኣደ፡ ንዓይ ደኣ ኣይርከበኒ እምበር እንታይ ገዲሱኒ ኣይበለትን። ብዛዕባ ህዝባን ሃገራን ጾር ተሰሚዕዋ፡ ኣብቲ ነቃዕ ደው ክትብል ብምምራጻ ዓቢ ስራሕ ዓሚማ። ሰውራ ኤርትራ ብዘይ ኣዴታትናን ኣሓትናን ፈጺሙ ስጉምቲ ኣምኸደን። ስለዚ ድማ ኢና ኣዴታትና ኣሓትናን፡ ብቃልሰን ዘረጋገጽኦ፡ ክብርን እፎይታን ማዕርነትን ይግብአን እንብል።
ሕጂ’ውን ኣብቲ ቃልሲ ንፍትሕን ዲሞክራስን ዝግብር ጉዕዞ፥ ኣዴታትና ኣሓትናን ድግዲግ ኤርትራዊ ሃገራውነት ተዓጢቀን ከም ወትሩ እጃመን የበርክታ ኣለዋ እሞ ሞጎስ ይግብአን።