መንግስቲ ሱዳን ኣብ እስራኤል ንዝርከቡ ሓተቲ ዑቕባ ንምምላሶም ዝግበር ምዝርራብ ክኣቱ ከምዝተሰማምዐ ጆሩሳሌም ፖስት ዝተባህለት ጋዜጣ እስራኤል ሎሚ ኣብ ዘስፈረቶ ዜና ገሊጻ።
እታ ጋዜጣ ቀዳማይ ሚኒስተር እስራኤል በንጃሚን ነታንያሁ ሎሚ ሰንበት ኣብ ናይ ካቢነ ኣኼብኡ፡ ኣብ ዝመጽእ ቀረባ ግዜ ልኡኻት ክልቲኤን ሃገራት ተራኺቦም ኣብ ዝተፈለላየ ጉዳያት ክዝትዩ ምኻኖምን ብምጥቃስ፡ ጉዳይ ምምላስ ስደተኛታት እውን ሓደ ምኻኑ ሓቢሩ። ሚኒስትሪ ወጻኢ ጉዳያት ሱዳን ብወገኑ፡ ምስ እስራኤል ኣብ ንግድን ጉዳይ ስደት ኣመልኪቶም ክዘራረቡ ምኻኖም ኣፍሊጡ።
ወሃቢ ቓል ምኒስትሪ ውሽጣዊ ጉዳያት እስራኤል ኣርየ ዴሪ ነዚ ስምምዕ እዘን ክልተ ሃገራት ኣብ ጉዳይ ሓተቲ ዑቕባ ኣመልኪቲ፡ ክሳብ ሒጂ ዝተፈልጠ ነገር ከምዘየለ ሓቢሩ።
እስራኤል ኣብ ሃገራ ንዝርከቡ ሓተቲ ዑቕባ ኤርትራውያንን ሱዳናውያንን ዝተፈላለየ ምስምሳት ብምምጻእ ናይ ዑቅባ ሕተኦም ብጥርኑፍ ክትነጽጎ ከምዝጸንሐት ዝፍለጥ ኮይኑ፡ ናብ ዝተፈላለየ ሃገራት ኣፍሪቃ ንምጥራዞም እውን ስምምዕ ከምዝነበራን ይፍለጥ። እንተኾነ ግን ኣብታ ሃገር ዝርከቡ ተጣበቕቲ ሰብኣዊ መሰላትን፡ ማሕበረ-ሰብ እስራኤልን ብዝገብርዎ ስራሕ ላዕለዋይ ቤትፍርዲ እታ ሃገር ነቲ ስምምዓት ክስርዞ ከምዝኸኣለ ይሕበር።
ኣብ እስራኤል ኣስታት 30 ሽሕ ዝኾኑ ኣፍሪቃውያን ሓተቲ ዑቅባ ክህልዉ ከለዉ፡ ካብዚኦም ዕስራ ሽሕ ኤርትራውያን ምኻኖም ይሕበር።
