ኣምባሳደር ማይክ ሃመር፡ ምስ ኣብ ኣመሪካ ዝነብሩ ኢትዮጵያዊያን ክመያየጥ ኢዩ

ብምሰረት ክፍሊ ወጻኢ ጉዳይ ሕብራት መንግስታት ኣመሪካ ዘውጸኦ ሓበሬታ፡ ፍሉይ ልኡኽ ኣመሪካ ኣብ ቀርኒ ኣፍሪቃ ኣምባሳደር ማይክ ሃመር፡ ኣብ ኣመሪካ ምስ ዝርከቡ ኢትዮጵያዊያን፡ ብዛዕባ እዋናዊ ጉዳያት ዝምልከት ዝርርብ ከካይድ ምዃኑ ተፈሊጡ ኣሎ። እቲ ኣምበሳደር ነዚ ዝግበር፡ ካብ 10 ክሳብ 19 ግንቦት ናብ ካሊፎርኒያ ኣብ ዝጎዓዘሉ ግዜ ኢዩ።

እቲ ኣምበሳደር ምስ ኣብ ሕብራት መንስግታት ዝነብሩ ኢትዮጵያዊያን ስደተኛታት ዝገብሮ ልዝብ፡ ነቲ ብ 2 ሕዳር 2022 ኣብ ፕሪቶሪያ ዝተፈረመ ውዕል ምቁራጽ ተጻብኦታትን ዕብየት ኢትዮጵያን ዝምልከት ኢዩ።  እቲ ርክብ ኣብ ከተማ ሎስ ኣንጀሎስ ግዝኣት ካሊፎርኒያ ዝካየድ ኮይኑ፡ እቲ ኣምባሳደር፡ ምስ ትወለድቲ ኦሮሞ፡ ኣምሓራ፡ ሶማልን ትግራይን ከምዝራኸብ፡ ብተወሳኺ፡ ብሓፈሻ ምስ ማሕበረ-ሰብ ኣመሪካዊያን-ኢትዮጵያዊያን ውን ከምዝዘራረብ፡ ኣዲስ ስታንዳርድ ጸብጽቡ ይርከብ።

ነዚ ርክብ ዘስተኣናግድ ዘሎ ትካል፡ ሓድነት ደቂኣንስትዮ ቀርኒ ኣፍሪቃ ዝተባህለ ኮይኑ፡ ምድንፋዕ ሰላምን ምሕያል ደቂኣንስትዮን ገለ ካብቲ ቆላሕታኣ ዝግበረሎም ዛዕባታት ከምዝኾኑ ጸብጻብ ኣዲስ ስታንዳርድ የረድእ። ብተወሳኺ ኣምባሳደር ሃመር ምስ ካንቲባ ከተማ ሎሳንጀሎስ ዝኾነት ከረን ባስ ክራከብ ከምዝኾነ ተሓብሩ ኣሎ።

ፍሉይ ልኡኻ ኣመሪካ ኣብ ቀርኒ ኣፍሪቃ፡ ብሰንኪ እቲ ኣብ ሰሜን እትዮጵያ ንክልተ ዓመታት ዝተኻየደ ደማዊ ውግእ ሓድሕድ ኣብ ልዕሊ ኤርትራ ብተደጋጋሚ ክሲ ካብዘቕርቡ ሰበ ስልጣን ሕብራት መንግስታት ኣመሪካ ሓደ ኮይኑ፡ ኣብዝሓለፈ ወርሒ ሚያዝያ፡ ምስ ትካል ሰላም ሕብራት መንግስታት ኣብዝገበሮ ዘተ፡ ሰራዊት ኤርትራ ካብቲ ዞባ ንምውጻእ ጻዕሪ ይግበር ምህላዉ ጠቂሱ ምንባሩ ይዝከር።