ፕረዚደንት ሶማል ንስልጣን ቀዳማይ ሚኒስተር እታ ሃገር ኣደስኪሉ

ፕረዚደንት ሶማል ዓብዱላሂ ፋርማጆ ንስልጣን ቀዳማይ ሚኒስተር ናይ’ታ ሃገር ከምዘደስከሎ ክፍለጥ ከሎ፡ በዚ ኣብ ሞንጎ ‘ዞም ክልተ ብዝካየድ ዘሎ ናይ ስልጣን ቅሩቑስ ፖለቲካዊ ናዕቢ ከይክሰት፡ ሕቡራት መንግስታት ኣሜሪካን ዓባይ ብሪጣንያን እቶም መራሕቲ ሶማል ነቲ ኩነታት ከተሃዳድኡ ጸዊዐን።

ቤት ጽሕፈት ፕረዝደንት ሶማል፡ ንስልጣን ቀዳማይ ሚኒስተር ዘደስከለሉ ምኽንያት ክገልጽ ከሎ፡ “ ቀዳማይ መሓመድ ሑሴን ሮብለ ኣብ ብልሽወና ከምዝተሳተፈን መሬት ህዝቢ ድማ ብዘይ ኣገባብ ብምጥቃሙን ምርመራ ይግበረሉ ኣሎ” ምህላዉ ክሕብር ከሎ፡ ብተወሳኺ እቲ ቤት ጽሕፈት፡ ስልጣንን ሓላፍነት ቀዳማይ ሚኒስተር ክሳብ ውጺኢት እቲ መርመራ ደስኪሉ ኣሎ” ክብል ኣፍሊጡ።

ቀዳማይ ሚኒስተር ሶማል፡ መሓመድ ሑሴን ሮብለ፡ ብወገኑ ኣብ ስርቂ ናይ ህዝቢ መሬትን ምትእታው ካልእን፡ ኣብቲ ኣብ ልዕሊኡ ዝግበር መርመራ ኢድ ኣታውነት ከምዝገብረ ይኸሶ።

ቤት ጽሕፈት ቀዳማይ ሚኒስተር ሶማል እቲ ፕርዚደንት፥ “ቅዋምን ካልኦት ሕግታትን ዝጠሓሰ እዩ” ክብል ብመንገዲ ትዊተር ኣብ ዘመሓላለፎ መልእኽቲ ኣፍሊጡ።

ኣብ ሞንጎ እዞም ክልተ መራሕቲ ሶማል ዘሎ ናይ ስልጣን ቁሩቁስ፡ ብሰንኪ እቲ ተዶናጉዩ ዘሎ ምርጫ ናይ’ታ ሃገር ከምዝኾነ ይሕበር። ፕርዚደንት ሶማል ነበር ብወገኑ፡ ነቲ ብፕረዝደንት ዓብደላሂ ፋርማጆ ዝተወስደ ስጉምቲ ኣመልኪቱ ኣብዝሃቦ ቃል፡ “ወተሃደራዊ ዕልዋ” ብምባል ኮኒንዎ። ብተወሳኺ ኤምባሲ ሕቡራት መንግስታት ኣሜሪካ ኣብ ሶማል፡ መራሕቲ ሶማል ነዚ ኩነታት ከተሃድድኡ ክምሕጸን ከሎ፡ “ኣምበሳድር ዓባይ ብሪጣንያ ኣብ’ታ ሃገር “ናዕቢ ቅቡል ኣይኮነን” ብምባል፡ እቶም መራሕቲ ነቲ ወጥሪ ከህድኡ ጸዊዓ።

ኣብ ፖሎቲካዊ ቅልውላው ኣትያ ዘላ ሶማል ዳግም ናብ ኲናት ሓድሕድ ከይተምርሕ ስግኣት ሰፊንወን ካብ ዘለዋ ሃገራት እያ።