ኣብ ማእከላይ ክፋል ኤርትራ ከባቢ ኣስመራ 4.6 ሬክተር ዝዓቐኑ ምንቅጥቃጥ ምድሪ ከምዝጋጠመ ካብ ዝተፈላለዩ ምንጭታት ዝተረኽቡ ሓበሬታ የመልክት። እቲ ምንቅጥቃጥ ምድሪ ሰንበት 5 ሰነ 2022 ብኣቆጻጽራ ኤርትራ ሰዓት 3:38 ድሕሪ ቀትሪ፡ 10 ኪሎ-ሜተር ዕምቆት ትሕቲ ምድሪ ከምዝተመዝገበ ተሓቢሩ።
ን መጀመርታ ብዛዕባ እቲ ፍጻመ ብ ስይስሞሎጂ ትካል ማእከል ምርምር ጂኦሳይንስ ጀርመን (GFZ) ክቀርብ ከሎ፡ ድሒሩ ብ ዜጋታት፡ ስይስሞግራፍ መርበብ ራስፕቤሪሼክ 4.6 ሬክተር ዝዓቐኑ ምንቅጥቃጥ ምድሪ ከምዝጋጠመ ኣብ መግለጺኡ ይገልጽ።
ማእከል ስነ-ምድራዊ ምንቅጥቃጥ ምድሪ ኤውሮጳ-ማእከላይ ባሕሪ (EMSC)፡ ተመሳሳሊ ምንቅጥቃጥ ምድሪ 4.8 ሬክተር ዝዓቐኑ ከምዘጋጠመ ይሕብር።
ኣብ መባእታዊ መረዳእታ ዝተረኽበ ሐበሬታ ብዛዕባ እቲ ምንቅጥቃጥ ዝኾነ ርኡይ ዕንወት ከምዘይስዓበ ክግለጽ ከሎ፡ እንተኾነ ግን ኣብ ከባቢ ማእከል እቲ ምንቅጥቃጥ ፍኹስ ዝበለ ምንቅጥቃጥ ብብዙሓት ሰባት ተሰሚዕዎም ክኸውን ከምዝኽእል ይሕበር።
ፍኹስ ዝበለ ምንቅጥቃጥ ምድሪ ኣብ ከባቢ ዓዲ-ቀይሕ ባጽዕ መንደፈራን ካልኦት ቦታታን ዝቕመጡ ሰባት ተሰሚዕዎም ክኸውን ከምዝኽእል እቲ ሓበሬታ ኣብሪሁ።
ኣብ ዝሓለፈ ዓመት ኣብ ከባቢ ባጽዕን ካልእን ኣስታት 3 ሬክተር ዝዓቀኒ ምንቅጥቃጥ ምድሪ ኣጋጢሙ ምንባሩ ይዝከር።