ኣብ ክልል ኣምሓራ ከባቢ ዳባት ዝተባህለ ተደኲኑ ዝርከብ መዓስከር ኣለምዋጭ፡ ሓደ ኤርትራዊ ስደተኛ ብሰንኪ ሕጽረት ሕክምናን መጓዓዝያን ህይወቱ ክሓልፍ ከምዝኸኣለ፡ ራድዮ ኤረና ንምንጭታታ ብምጥቃስ ሓቢራ።
እቲ ኣብ 35 ዕድመ ዝርከብ ዝነበረ ኤርትራዊ ስደተኛ ብሕማም ኣብ ዝተጠቅዓሉ ግዜ፡ እኹል መድሃኒትን፡ ናብ ካልእ ሕክምና ዝሰጋገረሉ መጓዓዝያን ክርከብ ብዘይምኽኣሉ እዩ ዓሪፉ።
ካብ ክልል ትግራይ ሃዲሞም ዝመጹ ኤርትራውያን ስደተኛታት ኣብዚ ሓድሽ መዓስከር ይእከቡ ከምዘለዉ ዝፍለጥ ኮይኑ፡ ኣብ ዝሓለፈ ሰሙን ምስ ኣብቲ ከባቢ መስተ ሰትዮም ብረት ዝሓዙ ነበርቲ እቲ ከባቢ ብዝተፈጥረ ባእሲ ብዙሓት ኤርትራውያን ስደተኛታት ምቋሳሎም ይዝከር።
