ህወሓት ኣብ ልዕሊ ኣብ ትግራይ ዝርከብ መዓስከር ሰራዊት ፌደራል መጥቃዕቲ ከምዝፈጸመት፡ ቀድማይ ሚኒስተር ኢትዮጵያ ኣብይ ኣሕመድ ኣብ ወግዓዊ መረበብ ገጽ ፌስ-ቡኩ ኣብ ዘስፈሮ መግለጺ ኣፍሊጡ።
እቲ ቀዳማይ ሚኒስተር ኣብ መግለጺኡ፡ ህወሓት ኣብ ልዕሊ ንብዙሕ ዓመታት ንህዝቢ ትግራይ ክሕልው ዝጸንሐ ሰራዊት ፌደራል መጥቃዕቲ ብምፍጻሙ ቀይሕ መስመር ከምዝጣሓሰ፡ ኹናት ክልተ ወገን ዝደልይዎ ዘይኮነስ፡ ሓደ ወገን’ውን ተገዲድካ ትኣትዎ ከምዘሎን ህዝቢ ንዘሎ ኩነታት ብጥንቃቀ ክርእዮን ኣብ ጎድኒ ሰራዊት ሃገር ጠጠው ክብልን ጸዊዑ።
ኣብ ኢትዮጵያ ክኸይድ ዝጸንሐ ምፍኽኻር ናብ ደም ምፍሳስን፡ ዓቢ ኹናት ንከይቅየር ክስጋእ ዝጸንሐ ኮይኑ፡ ሎሚ ምሸት ኣማስይኡ ዝወጽእ ዘሎ ሓበሬታ ብዙሕ ናይ ቶኽሲ ምልውዋጥ ይስማዕ ከምዘሎ እዩ።